Y TA KEN SU TERA E TA?
E kuenta aki ta disponibel na Ingles i Papiamentu, wak e página na Ingles pa e tradukshon.
Y di ken e tera ta? Ta habri 23 di febrüari di 18 pa 21 den nos showroom!
“One Happy Island” nan a yama nos pero na final ta ken su tera e ta?
ora cu e olanan a bin aden, no tabatin caminda mas pa bay
piscadonan cu por a huy, a pasa man cu delaster un di nos cu por a drenta den e botonan
sin tempo pa gara nos pertenencianan
nos a subi lama contemplando awor nos isla fey distancia
e ultimo recuerdo visibel
e cabes di loke un biaha tabata nos toren di control aereo
awor balentemente briyando bou di e solo
pero alarmanan a bati añanan prome
na Savaneta
na Saliña
na Cutimara
na Illidge Road, Kerkweg y The Road
sinembargo ganashi a triunfa riba siguridad
lidernan a yena nan saco mientras cu e poco di nos cu a halsa nos bos
a keda confronta cu indignacion
camindanan pa trabao yena cu buraco
awa di pos contaminando nos lama
cayanan montona cu sushi
y cuebanan cu un tempo a refugia e marca di nos antecesornan, awor un monumento pa ignorancia occidental
Chris was here
Haidee was here
J.H. was here
(y pa solamente 100 dollar bo guia por hiba bo te na profunidad di e cuebanan. Naturalmente, no lubida di laga un tip durante bo salida)
nos lama cu santonan blanco awor propiedad priva
nos tenchinan manera sefta pa plastic
condominionan manera gulido ariba nos costanan
hotelnan all-inclusive
piernan yen di turista
“por wel di yama Playa e nobo South Beach”
anochi nos ta keiro den auto
maraviya p’e bida di esnan cu si ta disfruta di e paraiso
Chris
Haidee
J.H.
“One Happy Island” nan a yama nos
pero na final
Ta ken su tera e ta?
Y TA KEN SU TERA E TA?
Ta trata temanan di autarkia, desaroyo sostenibel, decolonisacion, turismo y e
interseccionalidad entre nan. E exhibicion ta invita e publico hunto cu e artistanan hoben di
Aruba y Curaçao, pa investiga diferente metodonan pa bira menos dependiente ariba turismo y
alabes explora recursonan sostenibel cu lo por contribui na e futuro di islanan ABC-SSS.
Ekspozishon ta keda habri 23-02-2024/21-04-2024
ku:
Quiana Cronie
Nigel Maduro
Goldiie
Natisha Engel (diseñado gráfico)
eventonan: Club di Buki
Caithlin (1997, Curaçao) ta artista, curado y organisado cultural. Na 2016 el a muda bay
Hulanda pa sigui un estudio di Bachelor den diseño di moda, unda a lo largo el a cambia pa un
estudio den artenan fini. El a gradua na 2022 y desde e momento ey el a embarca un buskeda
di conexion entre su dos hogarnan. E exhibicion aki ta e prome hilo cu e ta cose den su
compromiso pa traha cu mas artista Caribeño. E ta visiona un futuro comunitario cu por opera
pafo di un realidad individualista y hipercapitalista, unda hunto cu otro Caribeñonan, e por
explora preguntanan tocante nos pasado y kico esaki ta siña nos tocante nos futuro.
Goldiie, e forsa creativo tras di “by Goldiie’’, ta un marca cu ta duna bida na obheto y acesorionan traha na man. Originalmente for di e caluroso islanan di Boneiro y Curaçao, Goldiie ta awor na Hulanda unda cu su biahe artistico a haya un rumbo nobo. Goldiie no ta unicamente un diseñador, sino tambe un artista multitalentoso cu un habilidad special pa combina diferente forma di creatividad. Su inspiracionnan ta sali
for di bida cotidiano – su famia, conocinan nobo, storianan y combersacionnan cu hunto ta pinta su mundo.
Quiana Cronie, un diseñado Arubiano, ta dedica su mes na preserva e rikesa cultural di su isla uzando moda y storianan visual. Motiva pa su pasion di rebiba storianan cu a keda den olvido, particularmente esunnan di piscado y cunukeronan, e ta transforma leyenda den imagen y prendanan recicla y duradero. Den permiti su trabao forma un homenahe na e diferente storia y tradicionnan di su isla, e ta yena
buraconan generacional y percura cu Aruba su herencia ta sigui prospera pa e siguiente generacionnan. Awor empleando un enfoke multidisciplinario, Quiana ta
invita e spectador pa sumergi su mes den e escencia di Aruba su historia, cu ta fungi como un vinculo crucial entre nos pasado y presente.
For di e isla Caribense chikito yama Aruba, Nigel “Punky’’ Maduro ta un artista indigena Caquetio multidisciplinario y un activista interseccional cu un master den Strategic Leadership Towards Sustainability. Notoriamente conoci pa su detencion a
causa di e protestanan cu graffiti “Land back’’ y “No More Hotels”, Nigel a lanta un movemento socio-ambiental den e pueblo di Aruba. Su trabao ta mustra mundo henter con e industria aki ta daña cada bes mas e isla su medioambiente y herencia indigena Caquetio. Igualmente su trabao ta ilumina con hopi e region Caribense lo sigui perde, si entidadnan politico y administrativo sigui adheri na un modelo di
crecemento anticua.
Natisha Engel ta un diseñador grafico Caribense cu ta incorpora un pasion profundo pa arte contemporaneo den su trabao, cual ta specialisa den diseña marcanan cu ta impacta y empodera. E ta un diseñador multidimensional cu ta combina den forma complementario su formacion academico den Media y Industrianan Creativo cu principionan clasico di diseño pa crea obranan moderno. Actualmente estableci na
Hulanda, Natisha ta haya inspiracion den proyectonan cu ta permitie crea imagennan orguyoso y provocante. Carga cu ambicion, pasion y un wowo detayista,
Natisha ta posee e abilidad pa transforma conceptonan abstracto den encarnacionan visual cu por representa marcanan autenticamente. Su dedicacion na su arte ta evidente den e forma cu e ta canalisa su energia inovativo y dinamico pa trece ideanan na bida, asina lagando un impresion largo y duradero atras.